رواية كامله

محادثات قديمة كانت بينها وبين رامي، واكتشفت المفاجأة رقم الحساب ده يخص مين؟ يخص معتز، أخو رامي الصغير!
معتز كان شاب عاطل، مبيكملش في شغلانة أسبوعين على بعض، داير من كافيه لكافيه بعربيات أصحابه، وكل ما يتزنق يرمي حموله على رامي، ورامي عشان يعيش دور الأخ الكبير العتر الصراف كان بيبعتله ويسددله فواتير مصايبه من فلوس الحساب المشترك اللي مريم بتدب فيه تلتين مرتبها كل أول شهر كتحويشة للمستقبل وللشقة الملك اللي كانوا ناويين يشتروها!
مريم سندت ضهرها لورا، وأخدت نَفَس طويل خرج سخن زي النار. رامي كان بيعمل فيها بطل قومي، وهو في الحقيقة عايش على فلوس مريم اللي بتسند خرم جيبه المخروم، وفوق ده كله طالع يتفاصح عليها بكلام محمود المزور!
مسكت القلم، وشطبت على كل حاجة ببرود غريب. قالت في سرها بقى كده يا سي رامي؟ بتعايرني بلقمتك اللي أصلاً مش باقية منك؟ وحياة أمي لأربيك بالورقة والقلم ومن غير خناقة واحدة.
تاني يوم الصبح، مريم صحيت الساعة ستة، لبست طقم شيك جداً، وحطت ميك اب خفيف، ونزلت على الشغل وهي رايقة على غير العادة. لا عملت فطار، ولا ولعت على شاي، ولا بصت في وشه حتى لما صحي ولقاها خارجة من باب الشقة.
رامي صحي متلخبط، بطنه بتصوصو، والبيت هادي زيادة عن اللزوم. دخل المطبخ، ملقاش فنجان القهوة بتاعه جاهز زي كل يوم. حاول يعمل لنفسه بيض، كسر بيضتين في الطاسة، نص القشر وقع جوه السمنة، ولما جه يقلبهم اتحرقوا وريحة الشياط ملّت الشقة. رماهم في الحوض بعصبية، ساب الطاسة مكانها من غير غسيل، ونزل جري عشان يلحق شغله وهو مبرطم وغضبان.
عدى أول أسبوع، ورامي كان ماشي بمبدأ العند. كان فاكر الموضوع لعبة يومين وخلاص.
مريم كانت مقسمة خطتها زي الساعة السويسرية بالظبط أول خطوة فتحت حساب بنكي منفصل تماماً باسمها هي بس، وحولت عليه جزء كبير من مدخراتها اللي كانت حاطاها في الحساب المشترك كوديعة طارئة باسمها، وسابت في الحساب المشترك نصيبها العادل بالمليم من مصاريف البيت الأساسية؛ إيجار الشقة، نص فاتورة الكهرباء والنت والمياه، ونص مصاريف الصيانة للبواب.
تاني خطوة بطلت تشتري خزين البيت للأسبوعين والشهر زي ما كانت بتعمل. بقت تشتري أكلها هي بس؛ علبة زبادي، سلطة جاهزة، فاكهة، وسندوتشات خفيفة تاكلها في الشركة أو في أوضتها بهدوء.
رامي بقى يرجع كل يوم مهدود، يلاقي التلاجة مفيهاش غير خضار ني عايز طبخ، وعلب مريم الخاصة اللي لازقة عليها ورقة صغيرة بخط إيدها خاص بمريم.
أول كام يوم، رامي كابر أنا رامي الباشا، هقعد أتحايل على أكل البيت؟ غوروا إنتو وأكلكم! بقى يفتح أبلكيشنات الدليفري؛ يطلب وجبات برجر فخمة، وبيتزا عائلية، وشاورما سوري، وقهوة ستاربكس كل يوم الصبح في طريقه للشركة.
كل يوم كان بيصرف في الأكل والشرب بس مش أقل من ثمنمية ل ألف جنيه، وهو مش واخد باله. الكارت في إيده وبيدوس دفع من غير ما يبص على الرصيد.
في المقابل، البيت بدأ يضرب يقلب.
مريم كانت بتدخل أوضتها تنضفها، تغير ملايتها، تمسح مكتبها، وبتغسل هدومها هي بس في الغسالة الأوتوماتيك، وتنشرها على المنشر الصغير جوه أوضتها!
أما بقية الشقة؟ الصالة بدأت تترب، الزبالة في المطبخ اتكومت، والحوض اتملى بالأطباق والمعالق اللي رامي بيستخدمها ويرميها فيه، لحد ما ريحة المطبخ بقت لا تطاق، والدبان بدأ يحوم حوالين الحوض. هدوم رامي المتسخة بقت جبال فوق كرسي الأنتريه، قمصان الشغل بتاعته اتكرمشت وبقت ريحتها عرق، ومبقاش لاقي شراب نضيف يلبسه الصبح!
في اليوم العاشر من الشهر، رامي دخل على مريم وهي قاعدة بتقرا كتاب في الصالة، بعد ما فضلت قاعدة قدام التليفزيون بمزاج رايق.
رامي وشّه كان باهت، وقميصه كان مكرمش بطريقة تفضح، وكان باين عليه الإرهاق.
وقف قدامها وقال بنبرة فيها عصبية مدارية إيه القرف ده يا مريم؟ إنتي شايفة منظر المطبخ عامل إزاي؟ إنتي إزاي مستحملة تقعدي في البيت وهو زريبة كده؟
مريم قفلت الكتاب بهدوء، حطته على رجلها، وبصتله ببرود والله يا رامي، نص الشقة بتاعي نضيف وبيبرق، أدخل أوضتي كده شم ريحة المعطر. المطبخ بقى مش مسؤوليتي لوحدي، إنت بتاكل وبتشرب وبترمي حاجتك، إيدك مش مكسورة، شيل قرفك ورا نفسك.
رامي صرخ أنا راجل بشتغل طول النهار! مش هرجع أمسك سلكة مواعين بعد تسع ساعات شغل!
وأنا بشتغل عشر ساعات وبسافر التجمع كل يوم رايح جاي في الميكروباصات، مش زيك راكب عربيتك بمكيفها. وبعدين مش إنت اتفقت معايا؟ كل واحد يشيل شيلته؟ ولا كلام القهاوي بيطير في الهوا لما بيوصل لحد التنفيذ؟
رامي بلع ريقه، وعينيه لمعت بالغيظ، بس مقدرش يرد عشان الرهان اللي حطه على نفسه. قالها وهو بيجز على سنانه بسيطة.. أنا مش محتاجك أصلاً، بكرة أطلب واحدة تيجي تنضف البيت وتطبخ وتغسل الهدوم، وماليش دعوة بيكي خالص!
يا ريت، فكرة ممتازة برضه! مريم ابتسمت بخبث، وهي عارفة كويس إن اليومية بتاعة الست اللي بتساعد في البيت بتكلف كام، وإن الدراي كلين اللي تحت العمارة بياخد على القميص والمكواة كام.
تاني يوم، رامي جاب ست تنضف الشقة. الست طلبت في اليوم ستمية جنيه عشان تنضف البلاوي اللي متراكمة في المطبخ والصالة، وأخدت منه خمسمية تانية عشان تعمل له أكل يكفيه تلات أيام. رامي دفع وهو مبتسم نص ابتسامة قدام مريم، وكأنه انتصر. بعدها لم قمصانه وبدله كلها ونزل وداها الدراي كلين، وخرج من المحل دافع له ألف وميتين جنيه عشان يغسل ويكوي مستعجل.
مريم كانت بتراقب كل ده وهي بتعد في

سرها كده ألفين وثلثمية جنيه طاروا في نص يوم.. تمام يا بطل، كمّل وريني.
المصيبة الحقيقية بدأت تظهر في نص الشهر، وتحديداً يوم ١٧ في الشهر.
رامي قاعد في الشغل، تليفونه رن؛ كان أخوه معتز. إيه يا رامي يا حبيبي، فينك؟ القسط بتاع الفيزا بتاعتي نازل بكره، ومفيش في جيبي جنيه، عايزك تحولي العشرة آلاف زي كل شهر الله يسترك عشان البنك ميعمليش مشكلة.
رامي، وسط زحمته ورغبته إنه ميبانش ضعيف قدام أخوه، قال له حاضر يا معتز، نصاية وهحولك من الأبلكيشن.
فتح رامي تطبيق البنك على موبايله عشان يحول الفلوس، بس فجأة عينيه برقت زي الفنجان، وضرب كف بكف.
الرصيد في الحساب الجاري كان فيه ألفين وثمانمية جنيه بس!
مسك راسه بإيديه الاتنين إزاي؟! أنا مرتبي نزل من أسبوعين بس! فين الأربعين ألف جنيه؟!
فتح كشف الحساب وبدأ يقرأ، وبدأ العرق ينزل على جبينه زي المطر
قسط العربية تسع آلاف جنيه اتخصم أوتوماتيك أول الشهر.
مصاريف بنزين وكارتات وطريق تلات آلاف وخمسمية.
سحب نقدي ومطاعم وديليفري وكافيهات في أسبوعين بس ستاشر ألف جنيه!
فواتير غسيل ومكواة وست النضافة تلات آلاف جنيه.
جمعية كان داخل فيها مع زمايله خمس آلاف جنيه.
الحسبة كانت مخرومة من كل اتجاه. رامي مكانش بيحسب إن مريم كانت في الأيام العادية هي اللي بتسند معاه في تفاصيل مكنش بيلقي لها بال؛ لما كان بيعوز يغير زيت العربية مريم اللي كانت بتفكر وتدفع من مصروف البيت، لما التلاجة كانت بتتملي بلحوم وفراخ بالجملة تكفيهم الشهر كله بتكلفة ربع اللي هو صرفه على الدليفري المقرف، كانت مريم اللي بتدبر وبتوفر من غير ما يحس.
دلوقتي، وهو لوحده، الفلوس اتبخرت زي البخار في الهوا!
اتصل بيه معتز تاني إيه يا رامي، الفلوس لسه موصلتش؟ رامي اتعصب اصبر شوية يا معتز! مزنوق في الشغل هشوف وأكلمك! وقفل السكة في وش أخوه.
حاول رامي يحوّل من كارت المشتريات الفيزا المشتركة اللي دايمًا كان بيعتبرها النجدة لما الفلوس تخلص. دخل على الحساب عشان يحول لمعه العشر آلاف لمعتز، بس ظهرتله رسالة بالخط العريض على الشاشة العملية مرفوضة.. تجاوز الحد الائتماني المتاح!
رامي اتصدم. الحد المتاح للكارت كان خمسين ألف جنيه! إزاي متجاوز؟
اتصل بخدمة العملاء فوراً وهو بيغلي ألو.. مساء الخير، لو سمحت أنا بحاول أسحب من كارت الائتمان المشترك والعملية بتترفض ليه؟
الموظف بعد ما أخد بياناته رد بهدوء يا فندم، الكارت تم استخدامه بالكامل، وفي مديونية متأخرة بمبلغ ستين ألف جنيه لازم تتسدد قبل يوم عشرين عشان الفوايد متزيدش، بالإضافة إن الشريك التاني في الحساب الأستاذة مريم قامت بإلغاء خاصية السحب التلقائي من حسابها لتغطية الكارت بناءً على طلب رسمي قدمته من فرع البنك الأسبوع اللي فات.
التليفون كان هيقع من إيد رامي. يعني إيه ألغت السحب التلقائي؟!
الموظف رد ببرود يعني يا فندم كل المبالغ المسحوبة على الكارت ده